سه‌ركرده‌يگ پارتی: دجله يا بايه‌د وه ئاگر پێشمه‌رگه ب‌سزيه‌ێد يا رویوه‌ڕوی دادگا
بكريه‌‌ێد
شه‌فه‌ق نيوز/ ئمڕوو دوشه‌ممه، ئه‌دهه‌م بارزانی سه‌ركرده له پارت ديموكرات كوردستان، جه‌خت له‌وه كرد، ك سه‌ركرده‌و فه‌رمانده‌يل فه‌رمانده‌يی دجله رویوه‌ڕوی دو چاره‌نويس بوونه‌و، يا ئه‌وه‌سه وه ئاگر هێزه‌يل پێشمه‌رگه بسزيه‌ن يا هه‌واڵه‌ی وه‌رده‌م دادگا بكريه‌ن.
بارزانی له‌بان لاپه‌ڕه‌ی خوه‌ی له‌ماڵپه‌ڕ په‌يوه‌نديه‌يل كوومه‌ڵايه‌تی فه‌يسبوك ك (شه‌فه‌ق نيوز) ئاگاداری بوی، نويساگه: تا دويه‌كه چه‌ومان كه‌فته سه‌ركرده‌و فه‌رمانده‌يل ئه‌نفال ك چوين دادگايی كريه‌ن و ئمڕوويش سه‌ركرده‌يل دجله ئه‌گه‌ر بخوازن جه‌نگ وه‌ل كوردو كوردستانييه‌يل بكه‌ن ته‌نيا دو ڕێ ها نوايان، يا ئه‌وه‌سه وه ئاگر پێشمه‌رگه بسزيه‌ن له پشت ناوچه‌يل داوڕياگ نه‌ك له‌ناو خاك كوردستان يا بايه‌د رویوه‌ڕوی دادگا بكريه‌ن.
جی باسه، دامه‌زرانن فه‌رمانده‌يی دجله له‌لايه‌ن نوری مالكی سه‌رۆك حكوومه‌ت و سه‌ركرده‌ی گشتی هێزه‌يل چه‌كداره‌و ئه‌نجام گرد ئه‌را چه‌ودێری هێزه‌يل ئاسايش له پارێزگايه‌يل كه‌ركووك و دياله‌و سه‌ڵاحه‌دين ك بويه خاڵ ناكووكی ناونی هه‌ولێرو به‌غدا.
----------------------
كوردستان له نه‌ته‌وه‌يل يه‌كگرتگ خوازياره به‌شداری گفتوگووه‌يلی بكا
شه‌فه‌ق نيوز/ ئمڕوو دوشه‌ممه، حكوومه‌ت هه‌رێم كوردستان داوا له نوێنه‌ر نه‌ته‌وه‌يل يه‌كگرتگ له‌عراق كرد به‌شداری له گفتوگووه‌يل ناونی وه‌زاره‌ت پێشمه‌رگه‌و وه‌زاره‌ت وه‌رگری عراق بكه‌ن له‌باوه‌ت بارودوخ ناوچه‌يل داوڕياگ.
له به‌ياننامه‌يگ وه‌زاره‌ت پێشمه‌رگه‌ی حكوومه‌ت هه‌رێم ك روينويسيگی ره‌سيه (شه‌فه‌ق نيوز)، هاتگه ك دويه‌كه ئيواره شانديگ پايه‌به‌رز نه‌ته‌وه‌يل يه‌كگرتگ له‌عراق سه‌ردان وه‌زاره‌ت پێشمه‌رگه كردنه‌و له‌لايه‌ن جه‌بار ياوه‌ر ئه‌ميندار گشتی هێزه‌يل پێشمه‌رگه پێشوازی له‌ليان كرياو هه‌ردو لايه‌ن بارودوخ ناوچه‌يل داوڕياگ خستنه‌وه‌ر باس و له‌يه‌كه‌وداين.
له‌و به‌ياننامه يه‌يش ده‌ركه‌فت، ك له‌و دانيشتنه ياوه‌ر رووشنايی خستگه‌سه بان نه‌خش نه‌ته‌وه‌يل يه‌كگرتگ و له‌ليان داوا كردگه به‌شداری له گفتوگووه‌يل ناونی وه‌زاره‌ت پێشمه‌رگه‌و وه‌زاره‌ت وه‌رگری عراقی بكه‌ن.
جی باسه، شاند ناوبرياگ پيكهاتويد له هه‌ر يه‌ك له جۆرج بۆستن جيگر وه‌رپرس نويسينگه‌ی ئه‌ميندار گشتی نه‌ته‌وه‌يل يه‌كگرتگ له‌عراق و سوی كۆل وه‌رپرس نويسينگه‌ی نه‌ته‌وه‌يل يه‌كگرتگ له هه‌ولێر.
هیچ نظری موجود نیست:
ارسال یک نظر