پێشمه‌رگه ناوچه‌یل سنوورى وه‌ل سوریا كۆنترۆڵ ئه‌كا
شه‌فه‌ق نیوز/ سه‌رچه‌وه‌یگ تایبه‌ت ك نه‌تواستیه ناوی ئاشكراوه بوود وه رووژنامه‌نویسه‌یل وتگه: دویه‌كه شاند وه‌زاره‌ت پێشمه‌رگه‌ی حكوومه‌ت هه‌رێم كوردستان وه‌ل شاندیگ سوپاى عراقی له باوه‌ت هاتن هێزیگ حكوومه‌ت به‌غدا ئه‌را ناوچه‌ی زومار دانیشتنیگ وه‌رپا كردنه.
سه‌رچه‌وه‌گه زیاتر وتگه: له‌شوون چه‌ن سه‌عات باس و گفتوگوو هه‌ردولا رێككه‌فتنه له بان ئه‌وه‌گ هێزه‌یل سوپاى عراقی وه‌دریژایی 27 كیلومه‌تر بچووده دویاوه و كۆنترۆڵ ناوچه سنوریه‌گان وه‌ل سوریا وه‌ده‌س هێز پێشمه‌رگه‌ی كوردستانه‌وه بمینێ.جى باسه رووژ 27 ته‌مموز هه‌ردو لیوای 37 و 38 سوپاى عراقی ك له 7 هه‌زار سه‌رباز پێكهاتوین وه‌بڕیاریگ سه‌رۆكایه‌تی ئه‌نجوومه‌ن وه‌زیره‌یل عراق وه‌دریژایی 60 كیلومه‌تر جیگیركریان وه‌لی هێز پێشمه‌رگه‌ی كوردستان نه‌یشت ئه‌و هێزه‌یله بڕه‌سنه ناوچه‌ی زومار و یه‌یش بویه بایس سه‌رهه‌ڵدان كێشه‌ی تازه‌یگ له ناونی كورد و به‌غدا.
-----------------------------
ده‌سه‌ی باڵای كورده‌یل سوریا ئه‌را پڕه‌وكردن بوشایی ئاسایشی له ناوچه‌یل كوردنشین ئاماده‌س
شه‌فه‌ق نیوز/ ده‌سه‌ی باڵای كورده‌یل سوریا دویه‌كه له هه‌ڵوێست ئه‌نجوومه‌ن نیشتمانی سوریا له باوه‌ت ئعتراف كردن وه‌ماف كورد له سوریای ئاینده پێشوازیكرد و بڕیاریشدا چه‌ن لیژنه‌یگ ئه‌را پڕه‌وكردن بۆشایی ئاسایشی له ناوچه‌یل كوردنشین سوریا دامه‌زرنێ.
ئه‌ندام ده‌سه‌ی باڵای كورده‌یل سوریا مه‌حمود محه‌مه‌د له‌ی باوه‌ته وه‌ئاژانس ده‌نگوباس ئاكانیوز وتگه: ده‌سه‌ی باڵای كورده‌یل سوریا له‌ی رووژه‌یل دویاخره چه‌ندین دانیشتن ساز كردگه و چه‌ندین بڕیار گرنگیش ده‌ركردگه.
محه‌مه‌د زیاتر وتگه: ده‌سه‌گه بڕیارداگه پابه‌ند بمینێ وه‌و رێككه‌فتنه ك له ناونی ئه‌نجوومه‌ن نیشمانی كوردستانی و ئه‌نجوومه‌ن ملله‌ت خوه‌رئاوای كوردستان نزیك له په‌كه‌كه ئمزا كریاگه و یه‌یش خستگه‌سه روی ك رێككه‌فتنه‌گه هه‌فت خاڵ گردگه‌سه خوه‌ی ك تائیسه سێیانیان جیوه‌جی كریانه و ئه‌وه‌كانیش له ئاینده جیوه‌جی كریه‌ن. مه‌حمود محه‌مه‌د وه‌یه‌یش ئاماژه كردگه ك ده‌سه‌گه له‌و پارت و لایه‌نه‌یل سیاسی كوردستانیه ك به‌شدار له هه‌ردو ئه‌نجوومه‌نه‌گه نین داوا كردگه بانه ڕز ده‌سه‌گه، له‌وه‌ر ئه‌وه‌گ یه‌كڕزی و یه‌كده‌نگی هێزو لایه‌نه‌یل سیاسی كوردستانی ته‌نیا ڕێیگه ئه‌را ده‌سه‌وه‌ركردن مافه‌یل ملله‌ت كورد له سوریا.
----------------------
هه‌ولێرئاماژه وه وسانن كلكرده نه‌فتیه‌گه‌ی ئه‌یاد ئه‌گه‌ربه‌غدا هه‌ق وهساو كۆمپانیایه‌یل جه‌هانی نه‌یاد
شه‌فه‌ق نیوز/ ئمڕوو یه‌كشه‌ممه، وه‌زاره‌ت سامانه‌یل سروشتی له حكوومه‌ت هه‌رێم كوردستان، ئاماژه دا ك ئه‌گه‌ربه‌غدا هه‌ق وهساو كۆمپانیایه‌یل نه‌فتی كاركه‌ر له‌هه‌رێم نه‌یاد، ئه‌وه له‌كووتایی ئی مانگه كلكرده نه‌فتیه‌گه‌ی وسنێ.
وه‌ل ئه‌وه‌یشا وه‌زاره‌ته‌گه له‌سه‌ره‌تای ئی مانگه كلكردن نه‌فت جیا كرد وه هه‌ڵكه‌فت ١٠٠هه‌زار به‌رمیل رووژانه وه‌ئامانج خاسه‌وكردن متمانه‌ی ناونی هه‌ولێروبه‌غداو چاره‌سه‌رئه‌و كێشه‌یله ك په‌یوه‌سه وه مه‌سه‌له‌ی نه‌فت وغاز.
ئاشتی هه‌ورامی وه‌زیرسامانه‌یل سروشتی له به‌یاننامه‌یگ ك كۆپییگی ره‌سیه (شه‌فه‌ق نیوز) وت: كلكردن نه‌فت تا یه‌ك مانگ تر وه‌رده‌وامه، وه‌لی له حاڵه‌تیگ ئه‌گه‌رهه‌ق وهساو ئه‌و كۆمپانیایه‌یل نه‌فتیه نه‌دریه‌ێد ئه‌وه هه‌ولێرله شه‌و ٣١ ئی مانگه مه‌سه‌له‌ی كلكردن نه‌فت وسنێ.
جی باسه، حكوومه‌ت هه‌رێم كوردستان له‌ناوڕاس ساڵ ٢٠٠٩ ده‌سكرده كلكردن نه‌فت ئه‌را لویله‌ی ستراتیجی ك ره‌سیه‌سه به‌نده‌ر جیهان توركی وه نزیكه‌ی ١٠٠هه‌زاربه‌رمیل رووژانه‌و دویاخریش له‌ناوڕاس ٢٠١١ به‌رزیه‌و كرد ئه‌را ١٧٥هه‌زار به‌رمیل نه‌فت له رووژیگ.
هیچ نظری موجود نیست:
ارسال یک نظر