ئايا كورد شايان ئه‌وه‌سه ك ده‌وڵه‌تێگ ئه‌را خوه‌يان داشتوون!؟
شه‌فه‌ق/ له سه‌ره‌تا، ئيجاره توام هوير وباوه‌ڕ خوه‌م بارمه‌زووان و وه رووشنی و برای، وه‌ل فه‌رهه‌نگ به‌شه‌ردوسيا، وه‌په‌ی ياسايل و په‌يماننامه‌يل ناونه‌ته‌وه‌يی له باوه‌ت ماف نه‌ته‌وه‌يل جه‌هان قسيه بكه‌م.
بايه‌د وه يه‌كه‌و‌دان مێژوويی هه‌ستيار ناوچه‌گه ده‌س وه‌كاره‌وبويم و وه ئه‌ساس ئازادی هويرو باوڕه‌و ئه‌راچينه‌يله، هوير و ئه‌راچێنه‌يل كه‌سه‌يل تره‌ك رێزيان بگريمهو ئه‌ی چنه چشتێگ بكه‌يمه قسيه‌ی ريڕه‌و خوه‌مان.
وه‌ی مانای له قاپی بايمه ناو ك ئه‌را ئيمه ته‌مام ئازاديه‌يل وتن و هوير راسگانی ديموكراسيه‌ت باريگه‌و دی، بايه‌د خوه‌مان له كه‌نه‌سا كردن دويره‌و بكه‌فيم و وه كه‌سان تره‌كه‌يش ئيجازه به‌يم، هوير وباوه‌ڕ خوه‌يان بارنه زووان.
بايه‌د وه دوير له ئايدۆلۆژيا، باوه‌ڕه‌يل و پاراداميه‌يل خوه‌مان ك مێژوو ئه‌ی ناوچه سنوور داريه‌و كرديه‌و سه‌پانيسه‌ی سه‌رمان، وازه بكه‌يم و هويره‌يل خوه‌مان باريمه زووان.
له سه‌ره‌تاوه‌و بايه‌د وه قويلی به‌روادر خوه‌مان بگريم و بنه‌چه‌ك و زات خوه‌مان بويمه ژێر پرسيار، ئايا كورده‌يليش هه چوی نه‌ته‌وه‌يل ناوچه‌گه‌و جه‌هان ماف ئه‌و دێرن ك وه حه‌قه‌يل ره‌وای سروشتی خوه‌يان ره‌سيان بره‌سێد!؟.
ئه‌وانه نه‌ته‌وه‌یگن ك له وڵاته‌يل ناوچه له باوه‌ت قه‌واره و پيه‌نی، مێژوو و جۆگرافيا هويچ چشتێگ كه‌م نه‌ێرن. وه‌لی، ئايا كورده‌يل ئه‌و هێزو توانه دێرن ك كيان و ده‌وڵه‌تێگ ئه‌را خوه‌يان دامه‌زرنن!؟. ئايا له به‌رژه‌ووه‌ندی يا زه‌ره ناوچه‌گه‌س ك كوردستان وه سه‌قامگيری و هاوژيانی و په‌يوه‌نديه‌يل ئاشيتانه وه‌ل وڵاته‌يل ناوچه‌گه‌يا بڕه‌سێد!؟.
نه‌ته‌وه‌ێگ بێ ئه‌وه‌گ خوه‌ی بخوازێد، سه‌رزه‌مينه‌گه‌ی و خاكێ وه سه‌ر وڵاته‌يله‌و به‌شه‌و كرياس و به‌ێداخه‌يل جوورايجوورێگ له سه‌ر خاكه‌گه‌ی چقياس و سه‌ر وه ئاسمان كێشايه.
نه‌ته‌وه‌ێگ هه‌ر ئه‌وچگ ديرێد ئه‌را ره‌سين وه ئارمانج و هيوا خوه‌ی فه‌داو قوربانی ئه‌كا، ئارمانجيشێ ره‌سين وه سه‌ره‌تايی ترين مافه‌يل، سه‌روه‌خوه‌يی و داشتن ماف چاره‌نويسه. نه‌ته‌وه‌ێگ وه مرۆڤايه‌تی باوه‌ڕ ديرێدو هويچ وه‌خت ماف كه‌سان تره‌ك ژێرپا نه‌كرديه. نه‌ته‌وه‌ێگ توان ئيداره كردن كاروبارو خوه‌ی ديرێدو وه‌ژێرخان سروشتی خوه‌ی وه ده‌سميه‌ت هويچ لايه‌ن تره‌ك هه‌وه‌جه‌ی نيه.
يه يه‌كێگ له لايه‌نه‌يل خوه‌ی وه‌ڕيه‌وبردن و مه‌مه‌ره‌يل لايه‌نگيری ئه‌وانه له مافه‌يليان، هويچ كه‌س نيه‌تويه‌نێد نوای مافه‌يل بنه‌ڕه‌تیان بگرێد، بێجگه له‌و كه‌سه‌يله ك تا ئيسه وه خه‌ياڵ زڵم و سته‌م و له ناوبردن ماف كه‌سان تره‌ك توان ژێرپا بكه‌ن و وه‌پێشاني ئاخره‌گه‌ی نه‌كريا.
ئه‌ی نه‌ته‌وه مافيه ك ته‌مام شوونه‌وه‌اره‌يل زڵم و سته‌مێگ وه‌پێ كريايه له ناو مێژوو بسڕێدانه‌و ئاڵشتيانه بكاو بووده به‌شێگ له هێز و سه‌قامگيری له ناوچه‌گه.
كوردستان تويه‌نێد رێ پێشكه‌فتن و خوه‌شی بردن له مانايل سه‌رده‌م مۆدێرن بگريده وه‌رو بچوود قۆناغێگ ك بتويه‌نێد وه كه‌سان تره‌كيش ده‌سميه‌ت به‌يد.
ده‌س كه‌فته‌يل ساڵه‌يل وه‌رجله ئيسه‌ی هه‌رێم كوردستان، نيشانه‌ی فره رووشن له هێز نه‌ته‌وه‌ی كورده.
جه‌نگ و ئاشووه‌يل يه‌ك له‌دويای يه‌ك مێژوو ناوچه‌گه وه‌نيشته‌جی بويه‌يل ئه‌ی ناوچه خسيه‌سه ژێركارگه‌ری خوه‌ی و بويه‌سه مه‌مه‌ر يه‌گ وه‌رده‌وام نگران بوون.
ئه‌ڵه‌وگه‌ردانن و ماف چاره‌نويس و پراكتيكی كردن ئارمانجه‌يل ئستراتيجيكی له ره‌زار يه‌كم وانه وه هساو ئه‌ياد ك وه‌ل پراكتيكی كردن ئه‌وانه‌يا، بڕيگ له شوونه‌واريل زڵم و سته‌م له‌دژ نه‌ته‌وه‌ی كورد له ناو بچوودو رێ ئه‌را ره‌سين مناڵه‌يل و نه‌وه‌يل ئه‌ی نه‌ته‌وه ئه‌را ره‌سين وه‌هيوای خوه‌يان و به‌رقه‌را بوين ئاشتی و سه‌قاميگيری له كوردستان بره‌سن.
وه‌سه‌ر يه‌وه ك كه‌سانێگ له باوه‌ڕه‌و ئيمان نه‌ته‌وه‌ی كورد زانياری دێرن، بايه‌د له پووس و ئايدۆلۆجی ته‌نگ و ترچ خوه‌يان ك وه‌ده‌س ديكتاتۆره‌يل له زه‌ينان چنينه، بانه‌و ده‌يشت.
وه‌لی فره له دوسداره‌يل ئه‌ی مه‌سه‌له‌ی هه‌ستياره ك وه ژيان مليۆنها ئايه‌م له ناوچه‌گه كاره‌گه‌ره، بايه‌د وه هويره‌يل و باوه‌ڕه‌يل خوه‌يان جارتره‌ك له‌سه‌ردا بچنه‌و وه ئه‌ی مه‌سه‌ڵه‌ياو ئه‌ی چنه هويره‌و بكه‌ن ك ئه‌گه‌ر ده‌وڵه‌ت عيراق ئاڵشته‌و نه‌ود، خوه‌يان له چ مه‌رجێگ ئه‌و سه‌ر به‌نن!؟. ئايا وه‌خت وه نه‌هاتيه تا له هوير ديكتاتۆريه‌ت ده‌س بكێشن و ماف نه‌ته‌وه‌ی كورد وه‌پێان هه‌ڵه‌و گه‌ردنن!؟.
عيماد عه‌لی
----------------------------
سایت سی ئای ئه‌ی هاك ئه‌كريه‌ێ
شه‌فه‌ق/ چه‌ته‌یل ئینته‌رنێت تويه‌نستن دزه بكه‌نه ناو سایت ده‌زگای هه‌واڵگری ئه‌مریكا "سی ئای ئه‌ی"و ئه‌را ماوه‌ی نوو سه‌عات هاكی بكه‌ن.
له سه‌ره‌تاوه گروپ "ئه‌نۆنیمۆس" وه‌رپرسیاريه‌تی په‌لاماره‌گه گرده مل و ئعلان كرد، زانیاری له‌باره‌ی 46 هه‌زار كه‌س نیشته‌ای ویلایه‌ت ئه‌لاباماوه وه‌ده‌سهاوردنه، وه‌لی دوياتر "ئه‌نۆنیمۆس" له تویته‌ر ئعلان كرد مه‌رج نییه گروپه‌گه‌ی ئه‌وان په‌لاماره ئه‌لیكترۆنییه‌گه ئه‌نجام داوين.
------------------------------
هیچ نظری موجود نیست:
ارسال یک نظر