ئاسایش شكایه‌تیگ دادگایی دژ هاووڵاتییگ واستی به‌رزه‌و ئه‌كا
له‌وه‌رسووكایه‌تیكردن وه ئاڵای كوردستان
شه‌فه‌ق نیوز/ ئمڕوو چوارشه‌ممه، وه‌ڕیه‌وبه‌رایه‌تی ئاسایش شاردهۆك له هه‌رێم كوردستان، ئاشكرای به‌رزه‌وكردن شكایه‌تیگ دادگایی كرد دژ هاووڵاتیگ نیشته‌جی شار كووت له پاریزگای واست باشوور به‌غدای پایته‌خت له‌وه‌رئه‌وه‌ك له‌وه‌خت سه‌ردانی ئه‌را دهۆك له عه‌ید ره‌مه‌زان سووكایه‌تی وه ئاڵای كوردستان كردگه.
وه‌گووره‌ی به‌یاننامه‌ی وه‌ڕیه‌وبه‌رایه‌تی ناوبریاگ ك كۆپییگی ره‌سیه(شه‌فه‌ق نیوز)، حه‌مودی دلفی جایه‌ڵ جوان عراقی وه‌رجه ماوه‌یگ ره‌سمیگ خوه‌ی له‌بان ماڵپه‌ڕكوومه‌ڵایه‌تی فه‌یسبوك داناوید و سووكایه‌تی وه ئاڵای كوردستان كردویدو نویساوید: كوردستان بووه‌خش، عراق یه‌ك ئاڵا دیرید.
ئه‌و به‌یاننامه ئاشكرای كرد، ك حه‌مودی دلفی، ناوه راسكانیه‌گه‌ی ئه‌حمه‌د جواد كازم و ساڵ ١٩٩٢هاته‌سه دونیاو نیشته‌جی شاركووت باشوور عراقه‌و له‌ڕی كومپانیای گه‌شتوگوزاركنانی له عه‌ید ره‌مه‌زان ره‌سیه شار دهۆك و له یه‌كیگ له‌میوانخانه‌یل شاره‌گه نیشته‌جی بوی تا چه‌ن رووژیگ و له‌رووژ ٢٤ مانگ گوزه‌یشت له دهۆك ده‌رچی و ره‌سمیگ خوه‌ی له ٢٥ هه‌مان مانگ بڵاوه‌و كرد، ك ئه‌و ره‌سمیشه وه‌بی ئاگای خاوه‌ن میوانخانه‌گه گرتویده‌ی و له‌تی سووكایه‌تی وه ئاڵای كوردستان كردگه.
هه‌مان به‌یاننامه جه‌خت له‌وه‌یش كردگه، به‌رزه‌وكردن ئه‌و شكایه‌ته دژ دلفی له دادگای دهۆك و بڵاوكردنه‌وه‌ی ره‌سم و ناوه‌گه‌ی له‌گشت خاڵه‌یل وشكانن هه‌رێم كوردستان له‌وه‌رگرتن ڕی و شوون، وه‌گووره‌ی ئه‌و سووكایه‌تیكردنیه‌سه ده‌رهه‌ق وه ئاڵای كوردستان.
/////////////////////
٢٢ هه‌زارپه‌نابه‌رسوری ها له هه‌رێم كوردستان و حكوومه‌تیش ١٥٠٠دۆلار ده‌یده هه‌ركه‌سیگ له‌لیان مه‌یل پرووژه‌ی بویچگ دیرید
شه‌فه‌ق نیوز/ ئمڕوو چوارشه‌ممه، وزاره‌ت كووچ وكووچ وه‌پیكریاگه‌یل له حكوومه‌ت هه‌رێم كوردستان، ئاشكرای كرد، ك شماره‌ی ئه‌و په‌نابه‌ره‌یل ك هانه پاریزگایه‌یل هه‌رێم زیاتر له ٢٢ هه‌زار په‌نابه‌ره هه‌ر له‌سه‌ره‌تای قه‌یران سوریا.
له‌ی باوه‌تیشه‌و، شاكر یاسین وه‌ڕیه‌وبه‌ر گشتی كووچ و كووچ وه‌پیكریاگه‌یل هه‌رێم كوردستان، ئاشكرای كرد، ك لایه‌نه‌یل په‌یوه‌ندیدار له حكوومه‌ت هه‌رێم كوردستان هویر له ده‌سمیه‌تداین ئه‌و په‌نابه‌ره‌یله ئه‌كا له‌وانه‌ك مه‌یل كاركردن دیرن له‌ڕی داین ١٥٠٠ دۆلار وه هه‌ر یه‌كیگ له‌لیان ئه‌را وازكردن دوكان یا كوشكه‌یل بویچگ و مه‌شق كاركردن وه‌گووره‌ی ئه‌و پیشه‌یله ك زاننه‌ی.
یاسین له‌باوه‌ت ته‌قلای ریكخریاگه‌یل جه‌هانییش ك گرینگی ده‌نه كاروبار په‌نابه‌ره‌یل، وت: ریكخریاگه‌یل ناوده‌وڵه‌تی و لایه‌نه‌یل په‌یوه‌ندیدارنه‌خش وبه‌رنامه‌یل فره‌یگ دانانه له‌وه‌ر خاتر خاسه‌وكردن بار په‌نابه‌ره‌یل وه‌ل هاتن سه‌ره‌تای وه‌رز
زمسان.
//////////////////
ـ بارزانی و زوبه‌یدی له بان بته‌وكردن په‌یوه‌ندیه‌یل دولایه‌نه جه‌ختكردن
شه‌فه‌ق نیوز/ مه‌سعود بارزانی سه‌رۆك هه‌رێم كوردستان پێشوازیكرد له به‌یان جه‌بر زوبه‌یدی سه‌ركرده‌ی پایه‌به‌رز ئه‌نجوومه‌ن باڵای ئسلامی عراق و سه‌رۆك فراكسێون مواتن له په‌رله‌مان عراق.
سه‌رۆك بارزانی جه‌خت له بان بته‌وكردن په‌یوه‌نديه‌يل برایانه وتاريخی ناونی كورد وسه‌رجه‌م پیكهاته‌یل ملله‌ت عراق وه‌تایبه‌ت پیكهاته‌ی شیعه كرد وخوازیار يه‌یش بوی مقه‌يه‌تی له‌و په‌یوه‌ندیه‌و ڕی نه‌دریه‌یده هویچ كه‌س و لایه‌نیگ له‌كه‌داری بكا.
له به‌شیگتر دیداره‌گه له بان هاوكاری دو لایه‌نه ئه‌را چاره‌سه‌ركردن قه‌یران سیاسی وڵات وپه‌یا كردن میكانیزمیگ نوو ئه‌را وه‌ریه‌وبردن وڵات وپابه‌ند بوین وه‌ده‌ستوور جه‌خت كریا.
له‌ی دیداره زوبه‌یدی باس له‌وه كرد ئه‌نجوومه‌ن باڵای ئسلامی عراق پابه‌نده وه هه‌ڵویسته‌یل وه‌رین خوه‌ی له باوه‌ت مه‌سه‌له‌ی بته‌وكردن په‌یوه‌ندیه‌یل تاريخی دولایه‌نه‌و له هه‌مان وه‌خت قسه‌يل جه‌لاله‌دین سه‌غیر سه‌ركرده له ئه‌نجوومه‌ن باڵای ئسلامی دژ وه‌كورد ره‌ته‌وكرد.
هیچ نظری موجود نیست:
ارسال یک نظر